MIZORAM UNIVERSITY GOLD MEDALIST DARKAR 3 KA NI!!!!

 

MIZORAM UNIVERSITY GOLD MEDALIST DARKAR 3 KA NI!!!!

Lehkha zir peihlo leh thiam thei em em lo ni mah ila mahni subject tui zawng tak han zir chhoh takah chuan thahnem ngaih alo na in thiam belh chakna in ka khat ve ta a. Lehkha zir peih leh tui chilh chu ka lo nive deuh roh ta ringawt a.

College kal duhlo a New Delhi atang a ka haw hnuah Govt Zirtiri Residential Science College ah Direct admission te min pek theih avangin ka lut a. Khatih lai a college Principal JH Zoremthanga chungah pawh ka lawm hle mai.

Hun leh ni te aliam chho  ve zel a, College te pawh kan lo zo ve hnai ta reng mai. Ka tum ang leh duh anga Pathian khawngaihna te ka dawn avangin ka zirna ah pawh ka tluang ve hle nghe nghe a. Pondicherry Universtiy Central University ah ngat entrance ka paltlang avangin college final exam result chhuah hmain Aizawl khawpui chhuahsan in Puducherry khawpuiah ka chhuk fel a.Pondicherry University ah chuan admission te la felin ka tih ngai zawng zawng te chu ka tifel a, Mizoram lamah haw let tawh lovin class tan hunte chu ka nghak ta bawk a.

Ni 7th july 2017 alo her chhuak a, ka thianpa Mizoram haw tur chu Chennai lama va thlah turin bus ah kan chuang deuh thap a. Chutia bus chhungah eng em em tih tur a awmloh avang chuan phone chu ka check mai mai a. MZU website te en in kan result chu alo chhuak hi alo ni a. Merit list ah chuan ahmasa berah chuan ka lang ta vang mai a.Mizoram ah pakhatna chu ka nive ta reng mai. Ka va han lawm tak em aww… ka bula ka thiante pawh chu hrilh ve nghalin thenkhat result nghak ve mek te pawh result tha tak an nei vek nghe nghe.

Ka result chu en nin a har ka ti a, ka en nawn deuh tlut tlut mai a. Nimahsela kan en chik deuh hnuah chuan ka hnuai chiah a awm pa chu kei aiin a mark chu asang deuh zawk tih ka hmu thiam mai.. Rang takin MZU lama examination cell chu ka be pawp vat a, anni lah chuan anlo hrelo nasa mai si a. Kan sawi ngial pawh chuan uluk taka check leh upload anih thute min hrilh vei ang hlawrh hlawrh a. Lo check ve phawt tura ka hrilh hnuah phone kan dah thei hram a.

Minute 30 vel aliam a, ka phone a ri ta ral ral a, tudang nilovin MZU lam bawk chu an ni a. An tihsual anih thu te, pahnihna ka nih zawk thute chu thiam takin min hrilh a, keipawh chuan ka nihlohna han nih tlat kha ka tum hranlo bawk nen ka pawm thiam em em bawk a. Ngaihdam te min dil hnuah tha takin kan in thlah a,chuti chuan MZU gold medalist chu darkar 3 vel chu ka nive zuai anih chu.

Kan hringnun hi ngaihtuah ila, kan nih miahloh leh kan ta ni miahlo hi ni ang leh kan ta anga sawi leh lantir hi kan hrat em em vek a. Kei ngei pawh ka bang chuang miahlo. Mahse vawikhat a vawikhat chu he ka thil tawn avangin huaisen tak leh dik takin ka tive ka inti a, Pathian chungah pawh lawmna nasa tak ka neih ve phah ani.

Kanyakumari A Danglam Bik...

Kum lama naupang tak ka nih laia atanga ka hriatdan in Mizoram atanga India ramchhunga zin theihna hla ber chu Kanyakumari ani tih kha ani thin.Mizoram lam atang pawn a thu a zin an tam em em thin(in hriatthiam mai ka ring) tih pawh chanchinbu atangin ka chhiar ve thin a, chuti taka miten ataka kal pawh nilo athu ringawt a kal an awm thin vel dan atang te pawn ka kal ve chak thin hle a..

He khawpui hi ka kalchak takzet a,a khawpui awmdan te,a mi cheng te leh aram leilung hrim hrim khu ka zu rap chak tih thu hi vawi duailo ka sawi ve thin.Hun leh nite aliam ve zel a,ka chakna leh ka duhna te pawn zual lam pan aiin ka kal thei dawna ka in hriatloh avangin zawi zawi in ka rilru ah a reh ve tial tial bawk a..

 

Kum 2019 alo her chhuak a, ka tan zirna leh thiltam takah kum chhinchhiah tlak ani..Chutin ka naupan lai atanga ka kal chakna hmun Kanyakumari chu ka tlawh thei ve dawn tareng mai le...A ngai te te in kan team pathum Super Trio ka ti mai dawn em ni Sanju,Sabu leh kei te chuan kan la dailoh ram kal turin chu khawpui zirna avanga kan awmna chu kan hnungchhawn a,Kanyakumari lam pan chuan kan liam ta vang vang a..........

 

August 2019  thla alo thleng a,ka awmna hmun chu sawi tam ngailo in achiang mai e Kanyakumari ani tlat.Dar 9pm velah kan hotel kan thleng a,double room kan la a mahse pathum kan thleng thung(Phakar angai,zirlai sum neilo kan ni tlat hahaha)..Kan thlenna hotel mobile signal leh wifi a chhe kher mai a,thiante leh chhungte biak pawh ahar hle a.

 

A zan a zan in kan kalchhuak nghal a,kan rilte atam bawk nen an thilsiam te pawh atui ka ti hle. Ayala sangha phei chu kei tui ka ti fal hle a, sangha manto alo nilo bawk a,ka ei nasa ve viau chuan ka hria.Tin Zan lamah pawh mihring an tam hle a,an khawmi chauh an nilo tih chu achiang reng mai bawk..Khualzin kan in pel suau suau a, hmelhriat erawh an vang fu lawi si.

 

Zanlam kan vak chhuak kan haw leh hnu chuan Hotel counter a thu te ni chhuah hun tur leh a view point te kan han zawt leh te te a,an nin hawihhawm takin min hrilh a,tui takin zan chu kan mu ta a.

 

Zing takah vai pathian thawh hmain kan tho a,khua pawh ala varlo. Ni chhuak en na tur hmun chu kan pan a,ala thim chhah hle nghe nghe.Mahse kan kal chhan ber pakhat kha ani bawk si a,mut a chhuakin chauh ana ngei mai...Chutah le khawvar hun alo thleng ta a,nimahse ni chhuak reng reng hmuh tur a awm ta bawk silo,khua lah chu a eng un tawh mai si a,ni pawh lang silo in chhum karah a tawm tlat mai bawk si a,hrilh ahai duh ngei mai le..Keini chauh kan nilo,hnam dang tam tak helai hmun a nichhuak thlir tum te pawh chu an beidawng hle a,lunghnur takin kan haw ta dam dam  hlawm a.

 

Kan hotel ah kan let a,kan ni hman dan tur te relin kan tlawh duh te Google Map atangin kan han thlir kual vel baw k a.Tlawh duh kan ngahin kan kal duhna erawh a in ang vaklo thung...

 

Kanyakumari hi khualzin te kal tamna hmun anih ang ngeiin sumdawnna hmunpui ani a,kil tinah theih ang tawk tawk a thilzuar an tam in hawina apiang chu sumdawnna hmun ani mai..Chu mai anilo ,thil ho te te tlawh theih leh luh theih te a tam em em a,eng eng emaw Museum atam hle bawk..Tin Beach bul vela thil chei danglam tak tak te leh an bazaar hmun te chu anuam in an lun cher cher hle bawk a.Rul chhaih atanga Vaki ai en tir thlengin chu bazaar lun tak mai ah chuan a awm ani...

 

Kanyakumari hmunah hian  heng  Gandhi Memorial,Beach Side Park,View Tower,Vivekananda Rock Memorial, Thiruvalluvar Statue,Sunrise Point,St Xavier Church te kan kal a.Tin Kerala House te kan tloh bawk a,anuam dang dai hle bawk.

 

Thil tam tak ka tawn hi chu ka rindan leh hmundang ah pawh ka tawn thin tho anih avangin mak ka ti hranlo a,khualzin tam lutuk te,hmuntin mai sumdawnna hmun an ni te kha mak ka ti viau lo bawk,ka rindan ang vel tho ani.Mahse an leilung danglam lutuk kha mak ka ti a,Tamil Nadu State ka kal ve tawhna chin ah an ram a zawlin awihtlan kan tih ang chi hi a awmlo atih theih hial ang..Mahse Kanyakumari erawh chutiang nilovin chhuk chho alo tam ve em em mai a,chu chuan Kanyakumari ka rin ang a nih tir talo chiang viau a,A danglam bik hle...

 

Hun i nei a,India ramchhung a zinkual i duh chuan Kanyakumari tluk hi chu a awm kher bik awmlo e.Tuifinriat tuipui 3 heng Indian Ocean,Bay of Bengal,Arabian Sea in zawm khawmna lai hmun ani a,India ramah  he khawpui tluka India ram hmun kilkhawr hi a awm awm love.

Ka Zinkawng Buaina Leh Harsatna Thenkhat...

Ka zinkawng thenkhat ah tluang viau thin mahila thenkhat erawh tluanloh em em na ka nei nual mai. Chungte chu kan thai lang ve a nge.

 

Aizawl to New Delhi:

Ka thianpa nen hlim takin New Delhi lam panin kan chhuk a,kan tluanglo hle a hemi tum hian. Kan tluanloh dan hi hetiang deuh hi ani e.

Sumo a chhuk thla kan ni a,Silchar thlen hma deuh ah khuan Truck lian tak mai chu alo mu ngut mai pek a,keini tan han tlan tlang ngaihna hi a awmlo hrim hrim a,rei tak kan han tang leh rih phawt mai a.

Shillong kan thleng thla a,kan driver chu meizial alo zuk avangin an han man nghal ringawt mai a,a chahbi rang lutuk a Traffic Police in aphawi lai kha ka mitthla hian ala hmu thei. An han pe phal nghal mai lo chiang khawp a,driver chuan chuan man ka pe let mai ang che u ati a,Guwahati thleng tur kan nih avangin pawisa chu min han kir let leh phawt a.

Sumo dang Guwahati lam pan tur kan han zawng leh tete a,pakhat chu kan han hmu ve hlauh a,chutah chuan ka thianpa nen chuan tifuh inti tak leh vannei inti tak chuan kan han chuanglut tazan a. Rei arial lo, Truck lian tak mai chu tlan pel ahan tum a kan driver chuan, chu truck driver chuan alo kian lo nasa mai ,kan han accident teuh mai mai khawp a,chutah vawi hnih vawi thum lai mai chu chutiang a kana wm takah chuan kan driver chu athinrim hle ani tih ka hmuthiam mai a. Chutah le remchang awm hmasa berah chuan aleh pel thei ta,tlan vang vang chu khawilam hi ani ringawt, kan driver chuan ahnunglam a truck chu an dang ding te te a,a seat hnuaia thir tiang lian leh sei zet mai chu rang taka phawrh chhuah pah leh motor atanga chhuk pahin chu truck kan nunna lak tumtu tih hial mai tur khawp a lo tlan thin a chu apan ding ta nghal a,engmah sawi set set lo chuan truck hma darthlalang chu akeh chuai chuai mai le,chumai ala duhtawk lo a,driver chu a chhun nawk nawk bawk...Keini kum lama naupang leh puitling tello a kal kan nisi a,kan hlau ru dun ngei mai...

Guwahati kan thleng thla a,Mizoram house a room kan lak tawh chu engemaw buai a awm avangin kan lut theilo leh a,Maengi PG an tih ah chuan kan lut ta rawih a,nula Lalsangpuii ka thiannu em em alo awm bawk a,nuam pawh ka tiin tun hun thleng hian Guwahati ka kal hi chuan ka iptepui banna alo ni ta ani.

Train chuan New Delhi lam pan chuan kan kal a,Ticket te an han check zuai zuai a,ka thianpa chu Train Ticket a ID number leh ama ID ken chu a inmil lo tlat mai a,chu tak chu ticket check tupa khan ahmu fuh si a. Thiam ang tawk tawkin kan han dil a,naupang mai kan la nisi a,ka dilna leh kan ngenna chu a pawmlo nasa mai si,a thu tlukna awmchhun chu train station hmasa berah i thianpa a chhuk ang tih ani tawp.Manganthlak tak ani.Mahse vanneihthlak takin Mizoram lama Chakma nupa lo chuang vete kan han pun a,an nin min sawi fel sak a,kan him hram ani. Tin kan thian Chakma nupa te nen hian kan inkawm zui ta reng bawk a.

Shillong to Aizawl:

Thianho in IIT Guwahati ah PARAM ISHAN Super Computer an dah thar en turin kan kal a,Shillong bazaar pahin kan ti a,Guwahti to Aizawl ticket la si in motor dangin Shillong ah kan va phei te te a. Rei vaklo ah kan sumo chuanna tur chu lo thlengin kan bungrua nilo bungraw tam tak alo phur teuh mai a,kan bungrua dahna tur pawh awmlek lovin driver sum duh chuan mi thil alo phur teuh hi alo ni a.Driver chu bungraw phurh hmundanga dahtha mai tur a kan in hriat tir hnuah rei tak inhnial hnu in kan inti fel a,Mizoram lam panin kan tlan chho veleh ta a.

Pic: IIT,Guwahati classroom.

Mizoram kan thleng chho hnai a,khua avawt in December thla ani bawk a,thli thaw pawh avawt tha kher mai. Khawvar hma deuh chuan thil puakri ring tak mai chuan ka muthlu lai chu min kaitho chiang ngei mai,helho in minlo kap emaw ka tih lai chuan ‘A ke a puak’ tia an sawi thawm ka hria a,thlamuang tak chuan ka awm zui leh ta vat a.

Chu driver chuan a ke dahthat alo nei hauhlo leh nghal a,avan buaithlak tak. A ke ka va siam tir ange ati a,motor reitak a chan hnu chuan akal phei thei ta hram a...

Keini motor a chuang ho tan tihtur a awmlo hle a,ril atamin khua avawt ve em em mai bawk si a,rilru chu anuamlo ve khawp mai..Kan driver lah athang rei ta,lo letleh tih reng reng a awm theilo,min tlanbosan aniang tih vel ringawt bak ngaihtuah ahar ta...Rei tawk fang kan nghah hnu chuan chu driver kan nghahhleh em em mai chu alo lang veleh ta hlawl mai bawk a,kan lawm rilru ngei mai..A hnua asawi danin amutchhuak lutuk kha alova muhil hmak ni awm ani.

The Ghost Town 'Danushkodi' ah ka kal

15^th August 2019 alo her chhuak a,ka thiante pathum Arshad Sabu,Sanju Govind te nen rei tak kanlo tum lawk tawh chu kan ti hlawhtling dawn ta a.Kan kal tumna hmasa leh kan hmuh chak em em hmun Danushkodi,Tha Ghost town ti hial a an koh khaw ram tawh chu tlawh turin tlai dar li velah Puducherry khawpui chu Train in kan chhuahsan ta rawih a.

                                 

16^th August 2019 zinglam dar 6 velah Danushkodi area chu kan lut phei a,motor te ke pali neiin kan in phur phei a,kan hlim tlang hle a,khua ala var tha chiahlo na in kan mit kan len nasa bawk a,kan hmu thei vek tho mai.Tin Kerala mi pakhat thian kan chhar phei bawk a.

He khaw ram tawh kan kal chhan leh a chanchin hi han sawi hmasa ila atha awm e:

Sri Lanka ram  atang a Km 20 vel chauh awm, Tamil Nadu state a  khaw pakhat Pamban Island huam chhung ami niin Danushkodi tih hmingpuin khua an din a,khaw thangduang tak ni chhovin Train station,Custom office,Post and Telegraph office,Medical institution pahnih,Railway Hospital pakhat leh office dangte awm chhovin tudang an ngai bik hauhlo ang le..Nimahse an hmalam hun tur erawh an hrelo chiang hle a,hringmi zaleng zingah hmalam hun hrethei awm se khu khua ah khuan tumah an awm duh hauhlo ang le.

Kum 1964 December Ni 23 zinglamah chuan India ramchhung a cyclone na ber te zinga mi chuan chu khawpui chu dimna leh khawngaihna nei miah lovin an nuai tehreng anih kha le.He cyclone rapthlak tak a thawh lai hian Train chhunga Passenger chuang a dinlai alo ni tehreng bawk a,ava han pawi vawng vawng tak em..

Danushkodi hmun a in 5000 chuang chu a chhe nghal vek a,Sangha man nan a an hman thin lawng 500 chuang a chhe vek bawk..Tin rel chhunga chuang mi 200 te chu an boral nghal vek bawk a,khualzin mi 3000 chuang hmun him a awm te leh Danushkodi khaw bul tlawhtu te an tangkhang bawk.Hemi chhiatna ah hian mi 1800 aia tam thi a hriat ani a,he hmun chhiatna hi arapthlak em avang leh khawdin leh pawh ngam awm a an hriatloh avangin Tamil Nadu State sawrkar chuan THE GHOST TOWN tiin a hminglem a sak phah ta tawp mai ani.Hemi hmuna office lian tak tak te leh zirna in te,biakin te leh rel kawng te chenin Cyclone in a dah ang angin ala awm tawp mai ani..

Danushkodi thlen hma hian kawng thui em em mai KM 5 ngawt a sei kawng ngil em em mai hi alo awm a,kan motor chuanna a chhe viau amaw ka tina a kan tlanchak hle mai.Tin he kawng ngil thui tak hi kawng satliah alo ni hauhlo mai a,kan vei lam pang chu Bay of Bengal tuipui zau tak kha ani mai a,tin kan dinglam pang vethung erawh Indian Ocean alo ni leh zel a,helai hmun tluka danglam hi a awm ngai dawn emawni tih mai awl tak ani bawk.

Kan tlan phei zel a, Danushkodi khaw ram chu kan thleng phei a,engmah tlawh hmasalo leh en lo chuan Shri Ram Setu View Point(Danushkodi Beach) an tih chu kan pan leh te te a.Vartian tak tak ala ni a,ni chhuak engmawi tak te chuan min lo Welcome tha em em mai bawk si a,tin ahmun vel afaiin boruak athiang nasa mai si a,anuam ka tiin beach ka lo kal ve nual tawh na a,heti lai hmun tluka nuam ka tih hi ka la tawng awmlo e.Tin hemi ni hian kan kal hma em em vangin August ni 16 2019 hi chuan Danushkodi leh achhehvel tlawh tura kal hmasa ber kan ni nghe nghe tak kha.

Tin hemi hmunah hian sangha man hi khap tlat ani a,kan kal zing bawk aniang aruka sangha man tur te kan hmu a,ka hmel te alo danglam deuh a,min lawm der ve viau nitur ani thlalakpuiah te min sawm a,kutsuih chibai te pawh kan han in buk ang lawp lawp bawk a.Ka hriat reng chu an kut Tuifinriat al in a ei kha kan han in chibai khan hmuhloh theihloh leh tawhloh theihloh ani a, an kut te chu no hmel tak si khan a thap hle tih kha ka hre chiangin tun thleng hian ka mitthla ah ala cham thei nia.Thla te kan la zo a, phur tak chungin tuifinriat so bulh bulh kara a thuk lai lam chu panin hlim takin kan inthlah ta aa(Dar ang tawnni awm leh tak ang maw).

Reitawk fang kan awm ta maw tih ah chuan Danushkodi khua tak tak ah chuan kan va let phei leh a,rilru ah ahunlai a mihring chiai dan tur te leh a rapthlak dan tur te ngaihtuah rauh rauh chungin thla chu ka la ta nghauh nghauh a,tin hemi hmunah hian kan in phih fai vel tak kha male..

Kristian tlangval nita chu biakin chhia chuan ka mit ala ngei mai. Chiang takin an biakin te ka zir chiang a,an sak dan leh an lung hman te,a chhung zauh zawng leh a chhung a thuziak awm la chhiar theih deuh roh te chu ka en ve thuak thuak bawk a.

Tin hemi hun hi a special ka tih em em na chhan chu Sava an tam in Mizoram a sava vang ber te zinga mi Arawn(peacock) chu a tam hle mai a,an ngam in khualzin ten an lawm hle nghe nghe.

Kan unau ten nunna hial an channa hmuh mahnise heti lai hmun kher hi chuan Pathian them thiam zia leh athilsiam ropui zia hi nasa takin min hriat nawn tir a,hun ka nei ka kal leh thei anih ngat chuan hringmi zingah vannei ka inti ngawt ang le....

V

 

 

 

New Delhi ah College ka kal leh peihlo!!!

Helen Lowry school atangin pawl 12 chu ka theih tawk leh tlem a thain ka zo ve a, tin Mizoram Board of School Education ah top 10  huangah ka telve hial bawk a(Ka tan chuan ava hlu tak)!! College ka kal ve dawn tih ka hriat atangin Mizoram college ah hian kal hi ka tum ngailo a,pawl 12 ka han zo te pawh chu Mizoram khawi college mah kha luh tumin dilna lehkha pakhat pawh ka thehlut talo reng a.Ka hmalam hun tur hre ngat ila chuan ka la chiang viau tur ani si a ..

 

Ka tum ber leh ka duh ber chu New Delhi ah chhuk a,college zu kal kha ani mai a..Chuti taka chak ta na fam chuan University tha tak mai Guru Gobind Singh indraphrasta University ah dilna New Delhi lama ka unaupa leh ka thianpa Pranab Kaishtha chuan ka tih buai ngai miahlo in engkim minlo tih fel sak a.

 

Date 10^th May 2013 ah Chaltlang ah ka pa hovin Train ticket kan han la a,kan lak ni tlai dar 6 ah hian Guwahati panin Sumo in kan tlan liam leh nghal a(Laipuitlang leimin ni 11^th may 2013). Kan Sumo chuan na hi ka sikul kalpui thin alo ni reng mai bawk a,ka lawm rilru kher mai.Guwahati thleng tur hian kan tluanglo hle mai a,nuihzatthlak leh hlauhawm tak tak kan tawng a. Insual buai,Truck accident,Traffic  Police te nen a thubuai nei nuaiin kan tum ram hmasa chu kan thlengve ta phawt a.

 

Date 14^th May 2013 ah New Delhi ka thleng a, ka ni te bulah ka lut te te a,Mizoram house ah room ka lak avangin tlai dar 5 velah ka nite nupa in minva thlah a.Ka room no hi room no 111 ani.

 

Ka kal chhan ber pakhat entrance exam alo hun a,chu entrance atana ka inbuatsaih loh zia leh ka confi zia chu ropui tak ani.Exam ka zo a,ka thiamlo viau in ka in hria a,mahse Pathian zarah ka tling veleh hlauh mai bawk a..ST zar ka zo thei leh nghal a,hnamdang rank neitha tak tak te bawh kanin ka counselling date te chu ahma em em mai a,ka lawm rilru viau reng a.

 

Hun alokal a,ka tih duh leh ngai te ka han tizo deuh duak a,mahse ka rilru ah kimlo leh ruak a awm tlat thin a,ka hre thei mai bawk silo..Ka tawngtai a,ka nu leh pa te ka rawn reng thin bawk...Mahse chu ka nun ruak tak chu lunglenna leh khawharna ah a inlet ka ti mai,nasa takin ka haw chak ta tlat mai le...Mizoram a college kal duhlo leh kal tumlo tak kha kal chakna in ka khat ta si a.Tuma dan zawh rualloh in ka duhna leh ka tumna chu ka ti hlawhtlingin New Delhi ah college ka kal leh peihlo ti chungin ka chhungte ka hriattir te te a,ka haw leh ta daih a..!!!

 

He ka thiltawn hian zirlai tamtak min zirtir a,ka nunah nasa takin puitlinna kawngah min kaihruai a,chu mai anilo he hringnun ah hian kan tumna leh kan duhna te chu mihring thu leh ruat anih loh zia hi chiang takin Pathian hian min hriat tir ni hian ka hria a.Eng ang pawn mihring hian tumin bei mahila Pathianin kan tana aruat leh ka hmalama adah anihloh chuan holam takin a zuzi leh mai thin tih hi chiang takin ka hriatphah a ani...

Ka hna dilna hmasa berah min ringhlel!!!

Lehkhathiam thei leh mite aia rilru chak nilo ta chu harsa takin Pawl 10 chu kan inziak Passi ve mai bawk a,ka rilru a awm hmasa ber chu hna neih ani nghal a,a chhan chu lehkha ka thiam theihloh leh ka zir peih bawk siloh avangin ka tan chuan kawng dang thlan tur a awm hranlo bawk.

 

Chutia rilru lamah nasa taka ka in ngaihtuah lai chuan pawl 11 luh alo hunta leh  ta mai bawk si  nen,ka inziak lut leh ta ngawt mai bawk a.Mahse ka tui thei thlawtlo ani ber mai, ka thianpa ka classmate nen a inthurual in ****** Department a ********* training tur chu kan dil dun ta alom..

 

Written exam alo hun a,exam hall kan han lut reng reng te chu ‘anva Junior ve’ anlo ti nghal ringawt sir khat atangin,nuihaza lovin anuam hauhlo mai. Tluang tak chuan kan exam chu kan zo a,ka inbuatsaih rukna chu rin aiin alo chhuak tha a,ka rilru tak chuan ka tlin ve mai pawh ka ring rilru hle a,mahse ka vawikhat tih vena anih avangin ka hrethiamlo in rindan chin tawk pawh ka hrelo khawp mai thung.

 

Result te alo chhuak a,vanneih thlak takin leh ka zir ve chhun te kha afuh ve vang hrim hrim in ka tling ve hlauh a.Mahse lawm thei kala ni tlatlo,a chhanchu Interview ala awm tlat mai le.

 

Hun leh ni aliam a,Interview hun alo thleng ta,ka zam rilru viau chungin lehkhazir ka peih tawh thlawt loh avangin phur takin ka kal ve ta ngei a,engtin nge min tih dawn a,eng tawngka in nge min lo chhawn dawn tih hrelawk ngat ila chuan ka kallo chiang ngawt ang le.

 

Interview na hmun ka va thleng chu le ka pa rual te,ka u rual te,ka patea rual te ka interview pui tur anlo ni deuh nuk mai..Ihi leee ka haw leh daih mai dawn amanle aw ka ti rauh rauh a,mahse ka lehkha zir peih tawhlo na chuan min la hneh ngaih ngaih hle aniang chu,ka thu lut ve tawp ta a,thih leh thih ka ti rilru ta ve ang khang lai khan...

 

Ka interview hun alo thleng a,kan lut ve ta rap mai le. Chhairo mi 3 anlo thu,ka tan chuan thilthar ani,ka zak lutuk,ka thu ve ta rap mai le..Engtak min zawt ang mawle??

 

Zawhna ka dawn thenkhatte chu,zawhna zawng a danglam tak mai,rinhlelhna a chhunkhah a awmin hengte hi min han zawt teh reng anih kha: I chhungten an phal em ni? Arukin mi ilo dil? In zirtirtu ten an phal em ni? Ila naupang sia chance ila ngah a,midang i kian thei em? I chhungten tling mahla an phal dawn ami? I nu leh pa phalna in ilokal lo ang?

Tiin fiamthu leh tihtak deuhin min ti mai chu,kei ka vawikhat tih ve na leh khawr em em ni bawk si chuan ‘Ka hre bik nang’ ka ti zo deuh vek ni berin ka hria..Zawhna harsa min zawtlo a,ka tlin dawnlo zia leh van san zia chu ka mit awmna ka hriat tlukzetin ka chiang...Ka interview ka zo a,ka chawl khawmuang lemlo.Bus in kan in panin ‘ka lo va kal kher kher a’ ti rilru pahin chu ka chhungte remtihna tel hauhlova dil anga min ringhlel tlat tute lal ram chu ka liam san ta vang vang a.......

 

 

'Ka Thian' Music Video Ropui Takah Ka Telve

Music video han ti ila, Music video min tihsak kherlo mai thei bawk e..Master Degree Ka zirlai a ka batchmate te an ni e..Tin an ni hi MBA,Msc,MA,MCA tha takin an zo vek bawk a,ka chhuang hle ani...